تاريخ جي هر دور ۾، انسان جڏهن به ڪا نئين شئي ٺاهي، ان جي استعمال ۽ نتيجن تي سندس پورو ضابطو رهيو. هڪ سادي ڇريءَ کان وٺي ايٽمي توانائيءَ تائين، هر ايجاد محض هڪ اوزار (Tool) هئي. هڪ ڇري اهو فيصلو پاڻ نٿي ڪري سگهي ته کيس رڌڻي ۾ سلاد ڪپڻو آهي يا ڪنهن جو رت وهائڻو آهي؛ اهو فيصلو هميشه ڇري جهليندڙ جي هٿ ۾ هوندو آهي. پر هاڻي صورتحال بنيادي طور تي تبديل ٿي چڪي آهي. هٿرادو ذھانت (Artificial Intelligence) ڪو اوزار ناهي، پر هيءَ هڪ خودمختيار قوت (Agent) آهي، جيڪا پنهنجا فيصلا پاڻ ڪرڻ ۽ نوان خيال سرجڻ جي سگهه رکي ٿي.